Topp 10 toppturar til fots

Suldal er heim til uttalege turar, lange og korte, krevjande og enkle. Tett på naturen og ofte aleine i fjellet og skogen. Her kjem våre topp 10 toppturar til fots.

1. Hellandsnuten

Blå (Middels krevjande)
På Sand blir det gjerne sagt at du ikkje er ekta sandsbu før du har gått til Hellandsnuten. Turen startar ved Joagarden barnehage og går oppover i variert skogsterreng. Du passerer nokre bratte parti, og mot toppen møter du snaufjellet. Stien er godt merkt, og det er gjort betringar langs ruta, mellom anna med sherpatrapper i delar av dei brattaste partia.
Turen kan vere strevsam, men er vel verd innsatsen, for utsikta på toppen er nærast uslåeleg. Frå Hellandsnuten får du vid utsikt over fjord- og fjellandskapet rundt Sand, og over dei fem fjordane Sandsfjorden, Hylsfjorden, Saudafjorden, Vindafjorden og Lovrafjorden.
Turen tek om lag 5 timar.
‍

2. Reinsnuten

Raud (Krevjande)
I Gullingenområdet skil Reinsnuten seg ut i himlaleitet med den karakteristiske masta på toppen. Parker rett før du svingar opp mot Gullingen turistsenter og Breiastølsdalen. Herfrå følgjer du grusveg mellom koselege hyttefelt heilt opp til Stavastølen. No følger du stien opp til Reinsheia, med flott utsikt over Gullingen, hyttefelta og Mosvatnet. Terrenget flatar ut og du får ein naturleg pause før siste, bratte etappe mot toppen. Her oppe ventar ei mektig utsikt over høgfjellet, Gullingenområdet, men også ut fjordane mot Stavanger. Ein klårversdag kan du kanskje skimte byen langt der borte?
Turen tek 4-5 timar.

‍Ekstraskatt: Ha base på Gullingen turistsenter og gå alle fjelltoppane som omkransar deg. Går du seks av dei "godkjende" toppane kan du krona deg som Nutfant.
‍

3. Kleppsnuten

Blå (Middels krevjande)
I Erfjord tek du av frå Hålandsosen mot Østerhus. Følg vegen vidare mot Tveit og Liarstølvegen, før du parkerer ved stor grusparkeringsplass ved "Trædet"/"Treet". Rett ved parkeringa ser du skilting mot Kleppsnuten. Her følger du merka skogsveg eit lite stykke, og deretter merka sti. Flott utsikt mot gardane på andre sida av dalen kjem bak deg. Vidare til toppen med flott utsikt mot fjord og fjell.
Turen tek ca. 2 timar.  
‍

4. Grytenuten

Raud (krevjande)
Grytenuten byr på ei av dei flottaste utsiktene i Suldal, med panoramablikk over Ryfylkebassenget, Haugalandet og Sunnhordland. Turen startar ved Kjølvikstølen grendahus på Ropeidhalvøya, og går på merka sti til toppen, der du blir løna med vid utsikt i alle retningar. Det finst også ei alternativ rute til toppen frå Østebøneset.
Turen tek 4-5 timar.  
‍

5. Vinjanuten

Svart (Svært krevjande)
Parker ved Vinjar skule på Suldalsosen. Herfrå følgjer du vegen forbi kyrkja og vidare opp til det øvste byggjefeltet, der du kjem inn på den merkte stien mot Prestastølen og Vinjanuten. Dette er ein lang og krevjande tur med mykje stigning. Til gjengjeld får du fantastiske utsiktspunkt og naturopplevingar jamt og trutt på veg oppover, med utsyn over Suldalsdalføret, Ryfylkeheiane og fjordlandskapet i vest.
Du kan gå same veg ned att, eller velje rundturen vidare via Fisketjønsvardane og Gunntveitåsen, før du kjem ned att ved hovudvegen på Suldalsosen, om lag 3 km frå utgangspunktet.
Turen tek om lag 7 timar.
‍

6. Junkervarden

Blå (middels)
Start  ved Jelsa skule og følg merkinga til Storli. Gå over på skogsvegen, og ta til venstre etter at vegen deler seg – etter om lag 300 meter.  På toppen ventar fantastisk utsikt over Ryfylkebassenget, og Ryfylkes best bevarte strandstad: Jelsa. Turen tek ca. 3 timar.
‍

7. Fjetlandsnuten eller Røssenuten

Blå (middels)
Parker på stor grusplass ved Fjetland og følg vegen forbi den øvste garden og inn i bjørkeskogen. Her er lettgått terreng, og turen tek deg vidare opp over tregrensa. Du kjem til eit kryss og kan velje å gå til Røssenuten eller Fjetlandsnuten. Begge nutane gir deg flott utsikt over Halvøynå.
Turane tek ca. 3-3,5 time.
‍

9. Natlandsnuten

Raud (krevjande)
Parker på parkeringsplass på Hedlebrekk ved Gullingenvegen. Herifrå følgjer du skogsbilvegen og vidare i på sti. Her er skilta til Natlandsnuten og du tek av grusstien og over på vanleg merka sti. Turen går vidare inn til stølane i Frøkjedalen, og etter at du har runda vatnet startar stigninga opp mot toppen. Vel oppe er det fine badevatn å kjøle seg ned i ein varm sommardag. Flott utsikt!
Turen tek ca. 5 timar.
‍

10. Nipe

Raud (krevjande)
Frå Nesflaten tek du av til Roalkvamvegen og vidare inn på Bråtveitvegen. Her kjem du til skytebanen, der du kan parkere. Turen er bratt og går i krevjande terreng, men undervegs finn du bord og benk med flott utsikt over Suldalsvatnet – ein naturleg pustepause. Frå toppen ventar storslått utsikt over Suldalsvatnet.
Turen er 6,7 km tur/retur same veg og tek ca. 5 timar.

‍

For meir informasjon om turkart, sjekk ut "Vandring" på sida vår. Her kan du laste ned gratis turkart, eller du kan hente på Suldal turistinformasjon.
Du finn også meir informasjon på ut.no. Hugs å ferdast ansvarleg, vis omsyn og tenk miljø. God tur!