I Suldal finn du fleire av dei høgste toppane i Rogaland, i tillegg til fjordnære fjelltoppar med storslagen utsikt, vidder der du får landskapet heilt for deg sjølv, ei rekke flotte turisthytter og familievennlege, sentrumsnære rusleturar. Kanskje møter du ein og annan Suldøl på vegen, men her er det meir enn nok av fiskevatn, badeplassar og turstiar til oss alle! Sjekk vandreforslaga våre her og forlag til ditt neste fjelleventyr her. I sommarsesongen serverer dei trerettars middag og herleg frukostbuffet frå "perlå i Ryfylkeheiane", Stranddalen turisthytte. Suldal ligg også eit par timars køyring frå Preikestolen og Trolltunga.
Suldal er omkransa av majestiske fjordar, som på fine dagar ligg speglblanke mellom høge fjell. Her kan ein dra på mikroeventyr til idylliske fjordbygder, sykle tett på fjordlandskapet, slå seg ned på ei brygge for å leite etter krabbar eller legge ut med havkajakk. Fjord Experience tilbyr guida turar i Økstrafjorden, Aktiv Fuglestein tek deg med ut på SUP-brett og Helgøy Skyssbåt har guida turar i Hylsfjorden i juli. Les meir i arrangementskalenderen vår her. Det er også mogleg å leige båt, kano, kajakk og fiskeutstyr fleire stader i kommunen. Ønskjer du ein lengre tur kan du dra sjøvegen på dagstur til Stavanger slik dei gjorde i gamle dagar.
I Suldal har ein nok grender og småstader til å utforske ein ny stad kvar einaste dag i veka! Kva med ein grendesafari? Jelsa er den best bevarte strandstaden i Ryfylke, med kvite trehus tett i tett ned mot fjorden. I Erfjord kan ein besøke museumsgarden Hålandstunet og dra på fuglekikking. På Ropeidhalvøya kan ein finne vikinggraver og minnesmerke etter den største vikinghovdingen i Ryfylke! Gjennom våre kulturhistoriske løyper kan du bli tatt fleire hundre år tilbake i tid og lera om den rike historia til Suldal frå lokale forteljarar - direkte gjennom eigen mobil. I kommunesenteret Sand finn ein ei rekke lokale butikkar, kaféar, museum, badestrand og kulturhus - alt eit steinkast frå fjorden!
Er du ein erfaren laksefiskar eller nybegynnar? I Suldal finn ein fiskemoglegheiter tilpassa alle ønskje og kunnskapsnivå. Suldalslågen er vestlandets mest vassrike elv, og tiltrekk seg laksefiskarar frå fjent og nært kvar einaste år. Her tilbyr ein privat fiske, guida fisketurar, laksesafari og elveekspedisjon. I heiå finn du flotte fiskevatn der du kan nyte frisk luft og lyden av fisken som hoppar. Du kan også lære meir om laksen i Noregs første laksestudio.
I Suldal er me stolt over våre lokale råvarer og mattradisjonar, og alt ligg til rette for gode kulinariske opplevingar under oppholdet. I Sand sentrum finn ein ei ulike kafear og restaurantar der ein kan nyte gode rettar med utsikt utover fjorden og livet i kommunesenteret. Kvar torsdag møtest dei fastbuande til "komletorsdag" der vestlandets stoltheit blir servert. Ein kan også få med seg villmarkscamp der ein får servert gode rettar til knitringa av bålet i lavoen, dagens middag eller noko friskt å drikke i elveosen, firerettarsmiddag basert på lokale råvarer på eit designhotell i den vesle bygda Nesflaten, kjøpe kortreiste råvarer frå Sandsbygda eller trerettarsmiddag i høgfjellet som belønning etter ein flott tur innover Suldalsheiane.
I Suldal kan du også besøke produsentane sjølv på dei flotte gardane som ligg tett på fjell, fjordar og vatn. Hjå Midtsommar på Ropeidhalvøya kjem du tett på vinproduksjon med besøk i vinhagen, og det blir sjølvsagt tid til litt prøvesmaking! Hjå Fuglestein Fruktgard har dei over 17000-epletre der du får læra meir om produksjonen og smake på dei ulike produkta deira. Hjå Suldalshonning kan du få ei innsikt i det viktige og fasinerande livet til biene og sjå med eigne auge prosessen med å produsere honning. Træ Gården har også eigen gardsbutikk i Sandsbygda med kjøt frå mellom anna angus, villsau og ullgris. Oversikt over alle matskattane i Suldal finn du her.
I kommunesenteret Sand har me også vår heilt eigen lokalmat-butikk.
I Suldal kan du velge ut nye badeplassar for familien kvar einaste dag! Alle grendene våre har flotte badeplassar som du kan få for deg sjølv med både i saltvatn og ferskvatn. Her kan du nyte ein heil dag ved badestranda ved Mosvatnet, som kan kombinerast med tur i heia, båttur til nærmaste øy og ein forfriskande dusj i fossen. Ved Neset badestrand i kommunesenteret Sand kan ein leige strandutstyr og kajakkar.
Ved Suldal bad kan du utfordre familien til konkurranse i sklia, frå hoppebretta og i klatreveggen eller slappe av i boblebadet eller badstua. Du kan også unne familien ein kveld i vedfyrt stamp med utsikt over Suldalsvatnet eller Suldalslågen.
I Suldal finn du ei rekke flotte museumsanlegg som ein kan utforske både i og utanfor opningstida. Ved Nesasjøhuset møter du Kvitebjørnen frå barneeventyret til Rasmus Løland, ved Kulturhuset i Suldal kan du dra på galleriutstilling, frå klyngetunet Litunet får du majestetisk utsikt over Hylsfjorden og på storgarden Kolbeinstveit kan du besøke Rogalands eldste trebygg! Du finn også bowling, kino, bibliotek og arrangement på Kulturhuset i Suldal.
Arkitekturrundturen Suldal-Sauda-Røldal byr på historisk og moderne arkitektur i verdsklasse. Ruta har den beste samlinga av arkitektoniske verk i Fjord-Noreg og er den einaste Nasjonale turistvegen som presenterer både historisk og moderne arkitektur i eit dagsturformat. På Kilen på Nesflaten møter ein funksjonalistisk stil frå kraftutbygginga på 1960-talet, på Ropeid kjem fjorden inn vindauga ved "venterommet", ein kan bli inspirert av Lars Hertervig ved Ostasteidn og ved Høsebrua kan ein sjå Suldalslågen bruse under beina. I 2021 opna også ein ny installasjon på Ropeid kai!
Om sommaren er det mykje kjekt å finne på i heile kommunen. Ein kan få med seg kunstutstilling og kinoframsyningar ved Kulturhuset i Suldal, ta ei reise tilbake i historia på museumstuna til Ryfylkemuseet, utforske en handmåla stjernehimmelen i Jelsa kyrkje og oppleve fjordidyll under torgdagar ved Sand sentrum. Første helga i juni arrangerer ein også folkefesten Ryfylkedagane. Heile sommarprogrammet og opningstider finn du under "Kva skjer" og "Bli inspirert".
Suldal er eit flott utgangspunkt for å utforske regionen, midt mellom Preikestolen og Trolltunga. Nasjonal Turistveg Ryfylke og Discovery Route går gjennom kommunen, medan Nasjonal Turistveg Hardanger ligg like ved. Folgefonna, baroniet i Rosendal, Røldal stavkyrkje, Åkrafjorden, Haugalandet og Stavanger er flotte stopp dersom du legg ut på dagstur.
Felles for alle feriar til Suldal er gode opplevingar, nærleik til naturen og tid til å puste ut og ta dagane i eit rolegare tempo. Me ynskjer at du vaknar opp og kjenner på den friske lufta og fuglane som kvitrar. Me ynskjer at du tek tid under frukosten til å planlegge dagens eventyr. Me ynskjer at fokuset er på å vera i lag og å kjenne etter.
Ynskjer du fleire forslag til gode opplevingar i Suldal kan du lese her eller laste ned appen vår "Visit Suldal" i Google Play eller App Store. Me høyrer også meir enn gjerne frå deg på suldal@visitsuldal.no eller via melding på Facebook og Instagram om du treng hjelp eller tips til planlegginga!
No items found.
Gata 22, 4230 Sand (Sommarsesongen)
Sandsvegen 134, 4230 Sand (Heile året)
Tel: (+47) 97 77 57 57
E-post: post@nhryfylke.no
