Laksesafari – Flyt ned elva med fisken

Iført tørrdrakt, snorkel og maske, flyt du fritt med straumen i Suldalslågen på laksesafari med Mo Laksegard. Nokre stader så grunt at det følast som ein må knipe inn magen for ikkje å skrape mot dei flate steinane på elvebotnen, andre stader passerer du hølar meir enn 12 m djupe.

‍

Dette er eit natureventyr av ei anna verd. Ein laks piler forbi, ein anna står og stangar mot straumen. Vegetasjonen under vatn skifter mellom grøne vassplanter, fin sand og lyse, glatte steinar. Ein guide flyt med gruppa i vatnet, ein guide følgjer gruppa i kano.

Du må vera minst 14 år, symjedyktig og ikkje ha epilepsi eller andre sjukdomar som framkallast av kulde eller stress. Ta på innerst varmt godt undertøy. Resten av kleda som tørrdrakt, sko og dykkarmaske får du utdelt. Turen tek omlag 2,5 time.

I sommarsesongen har Mo Laksegard faste turar onsdagar og laurdagar. Utanom sesong tilbyr dei laksesafari for grupper på over seks personar. Meir informasjon finn du på molaks.no.

‍